Azərbaycanın 2024-cü ildə ev sahibliyi etdiyi COP29 – BMT-nin İqlim Dəyişikliyi üzrə Konfransı, ölkəmiz üçün mühüm əhəmiyyət kəsb edən beynəlxalq tədbirlərdən biri olmuşdur. Bu tədbir zamanı təkcə paytaxt Bakıda deyil, sahilyanı ərazilərdə də ekoloji təhlükəsizliyin təmin olunması və ətraf mühitin qorunması üzrə xüsusi tədbirlər həyata keçirilmişdir. “Marine Services” MMC olaraq biz də bu mühüm missiyaya töhfə vermək üçün fəal şəkildə layihəyə cəlb olunduq.
Layihənin əsas məqsədi, Bakı bulvarında yerləşən və ölkənin ilk üzən gəmi muzeyi olan Suraxanı Gəmi Muzeyinin ətrafında fencing boom qurğusunun quraşdırılması idi. Bu qurğunun əsas funksiyası – dəniz səthindəki mümkün neft sızmalarını, tullantıları və digər çirkləndirici maddələri bloklamaq və ərazidə təhlükəsiz, təmiz ekoloji mühitin qorunmasını təmin etməkdir. COP29 kimi qlobal bir tədbirin keçirildiyi dövrdə bu cür tədbirlər həm praktiki, həm də simvolik baxımdan böyük əhəmiyyət daşıyırdı.
Quraşdırma işləri üçün “Marine Services” şirkətinin 2 ixtisaslaşmış komandası xüsusi olaraq hazırlanmış iş qayıqları ilə prosesə cəlb olundu. Qurğunun suda sabitliyini və dayanıqlılığını təmin etmək məqsədilə lövbərlərdən istifadə edildi. Quraşdırma zamanı hava şəraiti, dəniz axınları və sahil quruluşu nəzərə alınaraq, boom elementlərinin düzgün şəkildə yerləşdirilməsi və gərginlik balansı peşəkar səviyyədə tənzimləndi.
Əməliyyatın hər mərhələsində həm təhlükəsizlik qaydalarına, həm də ekoloji standartlara tam riayət olundu. Komandamız tərəfindən yerində aparılan koordinasiyalı fəaliyyət nəticəsində layihə çox qısa müddət ərzində və heç bir texniki gecikmə olmadan uğurla tamamlandı.
Bu layihə, “Marine Services” MMC-nin təkcə texniki baxımdan deyil, ekoloji məsələlərə olan yanaşma baxımından da necə məsuliyyətli və diqqətli olduğunu nümayiş etdirdi. COP29 kimi tədbirlər zamanı beynəlxalq qonaqların qarşılanacağı ərazilərdə ətraf mühitin təmizliyi və sahilyanı suların qorunması bizim üçün sadəcə bir öhdəlik deyil, öncədən düşünülmüş bir prinsip məsələsidir.
Layihə çərçivəsində əldə edilən nəticələr həm dövlət qurumları, həm də beynəlxalq tərəfdaşlar tərəfindən müsbət dəyərləndirilmişdir. “Marine Services” olaraq bu işin bir parçası olmaqdan, ölkəmizi beynəlxalq səviyyədə uğurla təmsil etməkdən və ətraf mühitin qorunmasına xidmət göstərməkdən qürur duyuruq.